"New era of Pampanga politics" -- Fr. Governor Ed Panlilio

It's a miracle! No father, it's people power!!

Awsan deng "first time in Philippine and Pampanga history" ing melyaring eleksyun ngeni.

Ing pamanyambut ng Among Ed Panlilio bilang governor ning Pampanga, metung ya karing milagrung pangadi da alimu ring Capampangan nune ding Pilipinung magmalasakit king Pampanga.

Ing bilang da ring Capampangan a binotu para king tutung pamagbayu 219,706 ya. Ing diperensya na karing e maniwala king pari 2/3 la, pero meg 3-way split decision kaya ing lamang na ning pari king keyang pekamahigpit a kalaban 1,147 mu.

King aldong ini frontpage ya ing balitang ini king TV ampo karing dyaryu. Dakal la kasi ding e makapaniwala king melyari.

Pepakit da king TV, kikyak la king sobra saya ding anggang sinaup kang Among Ed abang kakanta de ing pekasikat a kantang capampangan ngeni pwera karing kanta ng Totoy Bato, ing "Capampangan Cu".

Kumpara karing kalaban na ning pari, eya ginastus dakal uling ding mismung tau ding sasaup kaya. Balang lalabasan na mamye pamangan o nung nanu man ing asaup da.

Buri de ing pari, dakal la ring maniwalang makasaup ya at ala yang "self-interest". Pero ing prublema, ede kilala kaya marakal mimisip baka ene man manyambut. Uli na niti dakal sinuporta kaya. Marakal karela businessman, media, civil society, religious group at election lawyers.

Minsan mu melyari king Pampanga ing makantining pamagmalasakit. Balamu pin "people power" ing melyari. Palage ku gang eya pari ing kinalaban karing amanwan dang "political giants", manyambut ya nung ikit da kaya ing pepakit ng Among Ed. Sana ding anggang pulitiku kalupa nala. Eya masisilo king pera at maragul ya takut king Apung Ginu.

Manibat king umpisa lalawen ku ing balita. Ikit ku nung pakananu kasanting ing melyari. Nokarin ka manakit pamangampanya a kalupa na ning gewa na ning pari? Keni mu king Pampanga.

Gang pakananu yapa ka palpak ing Comelec, ngeni dakal sasabing "mature" na la ding botanti. Makalunus la rugu ding dakal ginastus uling eda balu nung pakananu la manako pera ngening mesambut la.

King pamanyambut na ning pari buri ng milako ing pamanako king quarrying. Ing 400 million a akukwa da king quarrying dala na kanu para king pamagaral at pamanulu. Lako na kanu ing jueting at palitan ng "micro-enterprise".

Masanting ing planu na pero delikadu. Dakal la ring sira buntuk a e mabisa king masalese. King kekami, atlu lang barangay kapitan ing tuki-tuking mete uling lalabanan da ing shabu.

Neng kayi gang pakananu yapa kakayap ing pulitiku, uling matsura ya ing sistema na ning gubyernu at marakal dimonyus a makapaligid keya, mayayawa ya. Sana pin ali malyari ing makantini kang Among Governor. Balu ku, makasaup ya nung kalupa na ning pangalukluk na sopan de pa mu rin ding taung maganaka at tutung mapagmalasakit.

Awsan keng "moral thermometer" ing melyari karing Capampangan uling karing botu da abalu mu nung pilan la ring mayap ampong ali. Masaya ku mu naman king resulta. Uling gang marakal la ring marok, lintong menyambut la ring mayap. Kaya ngeni apagmaragul ku Capampangan ku.