Ing Kakung Pibatan

Madakal sasabing peka kontrobersyal at peka masayang eleksyun ya ining May 14. Bakit? Mumuran pera, marakal la ring kandidatung gagawang milagru bang manyambut. Istung antining panaun marakal la ring makabayan, maka-Diyos, mapamuladas. "Istung aku ing binotu yu..." Bala mu tutu. Deni namang paglokwan da, paloku noman. Sana pin ating pamagbayu ngeni.

Metung ya ing Pampanga kareng marakal media coverage ngeni. Bakit ali, nung ika ba naman ing botanti keni ninung pilinan mu? Ing asawa na ning Jueting Lord, ing incumbent governor a manako king quarrying o ing paring mangakung pamagbayu? Wa pari ya ing tinalakad para labanan no ding iganti. Alang aliwang matapang.

Eku balu o bat miras keni ing keganagana pero makatula. Anyang minuli ku kekami, balamu Fiesta. Dakal bandaritas, dakal propaganda. Gang nokarin ka lumawe ating poster da ring kandidatu. Pero mas makatula uling ding common poster area ala lang poster. Actually, makabwisit! Gang nokarin ka lumawe balamu makalat. Minu-minutu ating dadalan saken kakantang campaign jingle. Eku talaga atiis pero maybug kang mate king sobrang kangye. Eka mipatudtud masalese. Sumap eku karin maratun.

Ing eleksyun a ini, awsan keng "moral thermometer". Balu ku madakal karing capampangan, relihiyosu. Munta ka karing bale da ditak namu akit mula ding kegana-ganang santu. Anya istung mesambut ya ing pari, metung yamu ing buri ng sabyan - pelitan dano ring santu da karing dimonyus.

Anyang minuli ku, Maleldo. Marakal mamusang krus, magsalibatbat, maglinis kasalanan, magbayung bie. Ini ing tradisyun a emu alako karing capampangan. Gang pakananu pa ka high-tech ing panaun, apansin ku, ding bayung henerasyun asundu da ing panata da ding makatwa. Aisip ku tuluy, obat eku gagawan ing makantita. Eku talaga balu pero ing akakit ku karela masanting at buri ku mu naman.

Magtaka ku mu talaga obat ala yatang linaban king anak na ning presidenti a tatagal na naman congressman. Mantun kung poster na ning kalaban na, pero gang metung ala kung ikit. Dakal ya wari agawa king kekaming distritu? Eku balu pero palage ku alang pamagbayu. King Quezon City ku makarehistru, keni ku bobotu magmula nyang college. Buri ku sanang magtransfer Florida anyang 2004 pero masyadung masalimuut ing prosesu.

Ede man kilala i Fr. Ed kekami. Kaya aisip ku ala yang pagasang manyambut ing pari, sayang obat alang aliwang linaban. Ding tatagal governor taga Porac at Lubao la. Makalibutad kami karela. Palagi kung isipan obat mebisa la ring taga Masantol, Macabebe, Apalit, Minalin, Arayat, San Fernandu, San Luis, Mabalacat, Angeles at ding kasiping dang balen king makantini. Nokarin nala ding mangagaling a capampangan? Balu ku, mapamiru la ring capampangan. Pero ing eleksyun, eda neman sana gagawan biru.

Anyang minsan minaus ya i Ma ku, asabi na panalangin neng manyambut ing pari. Akilala da ne, a-isip ku tuluy baka pin atin yang laban. Sige, lawen tamu...